無綫小花李君妍因為樣貌酷似歌星陳慧琳，故有「翻版Kelly」稱號，擁有33C-24-34好身材的她一身白雪雪皮膚看似與沙灘格格不入，但原來她最愛去沙灘與陽光玩遊戲，有段時間更曬燶變成「黑妹」，她笑說：「以前成日多去沙灘，嗰陣大個女想試吓着泳衣，又想試吓曬黑，仲特登買埋黑鬼油去曬，但實在曬得太誇張、太黑，當時頭髮又短，畀啲朋友笑我好似家庭傭工，好朋友都勸我唔好再曬喇，女仔唔好曬到咁黑啦，之後就冇曬得咁勁，去沙灘都會狂塗防曬同埋擔遮，唔會再狂曬，大個女都要顧吓觀眾感受，唔想再曬到咁黑，女仔都係白啲好睇，哈哈。」

「呢啲都唔會係好男仔」

李君妍擁有33C上圍加上皮膚夠白，去到沙灘自然受到男士「監視」，她笑說：「畀男仔𥄫就梗有，哈哈。去沙灘都係同女仔friend去，試過幾次去廁所換衫，有男仔喺廁所門口等我哋，撩我哋可唔可以交過朋友，但第一個反應都係拒絕唔理佢哋嘅，呢啲都唔會係好男仔，所以都唔會畀機會佢哋。」

鍾情肌肉男

李君妍也會反「監視」肌肉男，她笑說：「咁我都會望吓沙灘瞓喺度嘅男仔，睇吓佢哋有冇腹肌、胸肌，自己鍾意有肌肉嘅男仔，唔使好大隻，最緊要有線條。自己好似鍾意彭于晏，身形好靚，皮膚唔會好黑、第時揀男友都要有啲胸肌、腹肌可以畀我拍吓，似彭于晏就就好啦。」

為新劇剪短頭髮

李君妍覺得自己身材剛剛好，最滿意是身材比例均勻，但也希望可以再結實點，特別希望減大腿，因有時穿牛仔褲覺得雙腳不夠修長，夏天為了穿泳衣會刻意減肥，早餐、午餐會吃多點，晚餐則會吃得輕盈，以生果、蔬菜為主。此外，近期李君妍則忙於為無綫新劇《心理追兇》開工，劇中飾演差婆，為此要犧牲長髮，她笑說：「為咗角色要剪短留咗兩年嘅長髮，難得覺得自己開始有少少女人味就要剪短，不過唔緊要，遲啲可以再留過。」