無綫新人曹思詩（CC）因外貌酷似唐詩詠而被封為對方的「翻版」，事實上她於藝訓班畢業後曾為節目《山系女孩Yama Girl》擔任主持，而近年更開始拍攝劇集，活躍於大銀幕。CC笑言因而勁渴望與對方出演姊妹：「細個多啲人話我似，我覺得少少似，但愈大愈唔似，佢好瘦。不過冇所謂，因為佢係個靚女，笑得好Sweet！（同佢試過演對手戲？）我好想有導演搵我哋做姊妹呀！」而CC亦自認獨立，拒做「痴身」女友：「我鍾意男仔有上進心，好專注於事業。（冇時間理你？）唔使成日理我，我好獨立，一星期見一日都OK。大家都要做嘢，我唔係貼身膏藥類型女仔！不過同我一齊就要全心Focus喺我身上，唔好掛住玩電話。大家相處時間已經咁少嘛。」

最愛食五花腩

CC雖擁有天生「蜜桃臀」兼C Cup上圍，但她透露熱愛做高空瑜伽以出汗減肥，她為怕瘦身兼瘦胸而狂做「推胸」健身：「我鍾意食甜品同五花腩，我好鍾意食五花腩，但食完又勁憎自己，所以我有做開Gym操Fit。（一減就瘦上圍？）所以我唔係點敢減，我會狂做推胸嘅健身設備，想自己Firm啲！」

對太陽又愛又恨

身材Fit爆的CC表示對其外表未盡滿意，又稱對太陽又愛又恨：「我塊面好肥似麵包，而且我曬黑咗好多，我好想白番。不過曬黑嘅話就算打扮性感都感覺健康啲，如果太白嘅話着得性感會怪怪哋。」

唔怕做「姣精」

CC透露最近有份拍攝無綫新劇《心理追兇Mind Hunter》，飾演王君馨大學同學的她要為角色學習大提琴：「我要識樂器，所以喺網上自學！」她搞笑表示心底裏渴望出演「姣精」角色，以搏取發揮機會：「我想演壞女人、小三、情婦嗰種勾引人嘅角色，太正經嘅我都做過。我好欣賞李佳芯，佢奸到入型入格。」